Benvido/a ao curso de formación Deseño de futuros espazos de aprendizaxe innovadores (Design FILS).

O mundo e a sociedade están a mudar, o mesmo que as aulas. Os espazos de aprendizaxe transfórmanse e evolucionan co paso dos anos. Hoxe, os novos espazos de aprendizaxe enténdense como lugares máis centrados no alumnado e máis flexibles, con maior capacidade para o desenvolvemento das competencias necesarias no século XXI.

Ao longo deste curso, has explorar futuros espazos de aprendizaxe innovadores, sistemas de aprendizaxe reforzada pola tecnoloxía e metodoloxías didácticas innovadoras. A participación no curso ofrece o coñecemento, as recomendacións e as ferramentes básicas para o dominio de conceptos tan diversos como os espazos físicos, virtuais e híbridos, as tecnoloxías dixitais, a aprendizaxe activa e os escenarios de aprendizaxe. No seu conxunto, o curso permite aos participantes entender mellor que significa a innovación no mundo da educación. 

Podes seguir o curso ao teu propio ritmo. A comezos de cada semana abriremos un novo módulo, se ben só te tes que preocupar pola data final de entrega (das probas e das actividades do curso).

Si o desexas podes compartir as túas impresións sobre esta formación en Twitter ou Facebook co cancelo #DesignFILS.

 Obxectivos de aprendizaxe

Ao rematares o curso, terás a capacidade de: 

●        Entender como deseñar contornos de aprendizaxe centrados no alumnado, de carácter colaborativo e social, motivadores, individualizados e estimulantes. 

●        Posuír ou desenvolver estratexias e técnicas con respecto aos aspectos clave do ensino en futuros espazos de aprendizaxe innovadores.

●        Analizar diversos parámetros que permitan pór en práctica unha aprendizaxe activa. 

●        Contribuír á promoción da innovación e da aprendizaxe reforzada pola tecnoloxía tanto dentro das escolas como máis aló delas.

●        Aplicar a metodoloxía dos escenarios de aprendizaxe como apoio a un sistema de ensinanza e aprendizaxe reforzadas pola tecnoloxía.

 Requisitos previos

O curso está pensado para o profesorado e para o persoal formador de profesorado. Pode resultar tamén de utilidade para calquera outra persoa voluntaria con interese en coñecer o concepto dos espazos de aprendizaxe flexibles e as novas prácticas educativas innovadoras.

 

Módulos

O curso consiste nun total de cinco módulos:

●        Módulo 1: Innovación nos espazos de aprendizaxe 

●        Módulo 2: Deseño de futuros espazos de aprendizaxe innovadores (Design FILS) 

●        Módulo 3: Aprendizaxe reforzada pola tecnoloxía en espazos FILS

●        Módulo 4: Metodoloxías didácticas innovadoras en espazos FILS 

●        Módulo 5: Escenarios de aprendizaxe

Cada módulo aborda unha dimensión concreta do concepto de espazos de aprendizaxe innovadores e inclúe contidos informativos, tarefas, sesións en directo, eventos ou actividades colaborativas e unha serie de recursos adicionais dos que tirar o máximo proveito ao longo do curso.

Certificación

Coa túa participación neste curso, poderás obter a certificación global como Formador/a ou insignias individuais de realización de cada un dos módulos relativos ás prácticas de aprendizaxe innovadoras e reforzadas pola tecnoloxía en contornos de aprendizaxe flexibles. Dete xeito, ao rematares o curso obterás:

•O certificado de Formador/a (pola realización do proxecto completo)

•As insignias de consecución de módulo (pola realización de cada un dos módulos)

Para información detallada sobre a finalización do curso e a obtención dos certificados, consulte as Condicións e criterios para a obtención dos certificados.

Socios colaboradores

Este curso é o resultado do traballo de colaboración entre o Ministerio de Educación Nacional de Turquía, a rede European Schoolnet, a Universidade de Lisboa, o FLL Viena, a Universidade de Hacettepe, o Centro Autonómico de Formación e Innovación e a Zakladni skola Dr. Edvarda Benese.

As orixes do curso

Este curso forma parte do proxecto Deseño de futuros espazos de aprendizaxe innovadores (Design FILS), financiado polo programa Erasmus+ KA2 (Cooperación para a innovación e o intercambio de boas prácticas) da Unión Europea, en virtude do acordo de subvención número 2019-1-TR01-KA201-076567. Para máis información sobre o proxecto Design FILS e os seus socios, consulte o sitio web http://designfils.eba.gov.tr. 

Aviso legal

O curso Deseño de futuros espazos de aprendizaxe innovadores foi elaborado polo Ministerio de Educación Nacional de Turquía, a rede European Schoolnet, a Universidade de Lisboa, o FLL Viena, a Universidade de Hacettepe, o Centro Autonómico de Formación e Innovación e a Zakladni skola Dr. Edvarda Benese, como parte do proxecto homónimo financiado polo programa Erasmus+ da Unión Europea. 

Este curso de formación en liña facilítase de boa fe en todo o relativo á validez, á exactitude e á exhaustividade da información contida nel. Porén, debe ter en conta que as opinións expresadas nel non teñen por que coincidir necesariamente coas da Comisión Europea ou coas de ningunha outra das organizacións socias. Cómpre tamén sinalar que os autores non son responsables das referencias de terceiros nin do expresado nos sitios web aos que se inclúen ligazóns, e que calquera ligazón incluída como referencia poderá ser modificada no futuro.

 

Agás que nalgún punto se indique o contrario, todos os contidos do curso están publicados con licenza Creative Commons Attribution-ShareAlike 4.0 International License.